Fastlege ved Årdal legekontor

Årdal kommune har ledig fastlegeheimel ved Årdal legekontor, med tilsetting frå snarast eller etter avtale. Me søkjer primært etter deg som allereie er spesialist i allmennmedisin.

Årdal legekontor er eit moderne og veldrive legekontor med eit godt og inkluderande arbeidsmiljø. Me har 7 fastlegeheimlar, der to er ALIS, i tillegg til LIS1 og eit solid kollegium av anna helsepersonell.

Kontoret er velutrusta med akuttmedisinsk utstyr, ultralydapparat, skiftestove, akuttrom, laboratorium og uniformert legevaktbil. Dette gjer oss rusta til å kunne handtere eit breitt spekter av allmennmedisinske problemstillingar.

I tillegg til utgreiing og behandling har tenesta ansvar for førebyggjande helse- og smittevernarbeid, helsestasjonsarbeid, tilsyn på sjukeheim og korttidseining, samt visittgang på kommunal akutt døgneining (KAD). Me har ei 7-delt vaktordning for daglegevakt.

Som fastlege hjå oss deltek du i den interkommunale legevakta ved Sogn lokalmedisinske senter, der Lærdal er vertskommune. Legevakta har ei 12-delt vaktordning fordelt mellom kommunane Årdal, Lærdal og Aurland.

Me nyttar Pridok som journalsystem.

Tilsettingsvilkår

Me ønskjer primært å inngå driftsavtale med lege som sjølvstendig næringsdrivande. Kommunen stiller med moderne kontorlokale, nødvendig medisinsk utstyr, hjelpepersonell og administrativ drift.

Som sjølvstendig næringsdrivande beheld du basistilskotet og betalar eit avtalt kronebeløp per listepasient per månad til kommunen.

Fastløn med insentivordning kan vurderast.

Listelengda vil vere om lag 930 pasientar, men kan justerast opp etter avtale.

Ved behov kan inntil 20 % av stillinga tilleggast andre kommunale helse- og omsorgsoppgåver, som til dømes sjukeheim, helsestasjon eller rettleiingsfunksjon for LIS1 og LIS3.

Kvifor Årdal?

Årdal kommune er ein nasjonalparkkommune med spektakulære eventyr rett utfor døra. Her bur du tett på fjord og fjell, med eit rikt tilbod innan friluftsliv og aktivitetar gjennom heile året. Om du likar fjellturar, ski, fiske, sykling eller andre utandørs aktivitetar, er moglegheitene mange.

Me er eit lite og inkluderande lokalsamfunn med eit godt kultur- og fritidstilbod, med aktive lag, organisasjonar og idrettsmiljø. Dette gir gode høve til å bli kjend med lokalsamfunnet og finne aktivitetar som passar for både born og vaksne.

For deg som flyttar til Årdal, kan kommunen tilby bustad. Me har også ei eiga tilflyttarteneste som kan hjelpe med å finne arbeid til ektefelle eller sambuar og knyte dykk til lokale fritidsaktivitetar og nettverk.

Kven ser me etter?

Me søkjer deg som:

• Har norsk autorisasjon som lege, utan avgrensingar
• Er spesialist i allmennmedisin
• Har gode norskkunnskapar, både munnleg og skriftleg
• Har erfaring med digitale verktøy
• Har førarkort klasse B

Me legg særleg vekt på at du har dei personlege eigenskapane me ønskjer: at du er sjølvstendig, løysingsorientert, har gode samarbeidsevner, er interessert i fagutvikling, og er relasjonsorientert og endringsvillig. Du må kunne rettleie legar i spesialisering.

Me tilbyr

• Fleksibilitet i høve organisasjonsform
• Ved fastlønsavtale: gode pensjons- og forsikringsordningar, der 2 % av løna vert trekt til tariffesta tenestepensjon
• Hjelp til å skaffe bustad
• Utleige av bedriftshytte på Skeikampen i Gausdal
• 12 timar gratis skulefritidsordning for elevar i 1. til 3. klassetrinn

Andre opplysningar

• Den statlege ordninga med sletting av studiegjeld med 25.000kr i året gjeld for deg som har bustadadresse i Årdal kommune. Sjå Lånekassen.no for meir informasjon om kvalifisering.
• Me gjer merksam på at ifølgje offentleglova §25, 2. ledd kan opplysningar om søkjaren bli offentleggjort, sjølv om du har oppmoda om å ikkje bli ført opp på offentleg søkjarliste. Dersom du har bedt om unntak frå offentleg søkjarliste vil du alltid bli varsla før søkjarlista vert offentleggjort.
• Alle nytilsetjingar vert gjort med ei prøvetid på 6 månader.
• For stillingar der det etter lov eller forskrift vert stilt spesielle krav til politiattest, skal det leggjast fram før tilsetjing.

Alle som søkjer må levere fullstendig søknad via Easycruit og oppgje minst to referansar. Alle søknader blir vurdert fortløpande og søknadsfrist kan bli utvida.